27. August 2021, 12:14
S'Bändeli System wird im Letzi wiitergfüehrt und ermöglicht, d'Zertifikatskontrolle wieder vorglageret zur Ihgangskontrolle z'mache. Ihr bechömed eues Bändeli miteme gültige Zertifikat bim MediaCampus01 (ab 11.30 Uhr) oder a dä Herderestrass (ab 14.30h Uhr). Mitem Bändeli und Ticket chunsch nacher direkt is Stadion.
Alli wiitere Infos zude Bändeli und Testmöglichkeite findsch da: Covid Regelig Letzi
Am Sunntig bliebed die drüü Pünkt in Züri! Muul abwüsche und gäge Servette alles geh - d'Mannschaft ufem Rase - mir uf dä Räng!
Chömed früehziitig zum Letzi, holäd eues Bändeli und sind rechtziitig im Stadion!
Vorwärts GC Züri
19. August 2021, 16:00
Rund 1 1/2 Jahr sind vergange sit mir s'letschte mal in Schaffhuse zäme eusi Mannschaft us de Kurve unterstützt händ.
Nachdem vieli Schwiizer Fussballszenene ahfangs Saison Rahmebedingige für e Rückkehr is Stadion festgleit händ, isch für eus immer klar gsi das ä Identitätskontrolle am Ihgang, au wenn im Zämmehang mit em Covid-Zertifikat ä Roti Linie isch.
Mit eme neue Bändeli System hättmer fürd Spiel im Letzi jetzt e Lösig gfunde wo au mir chönd akzeptiere.
Am Treffpunkt fürs Derby im Hardturm, wirds e vorglagereti Kontrolle vom Zertifikat gäh, wo alli chönd es Bändeli bezieh. S Bändeli + Ticket gilt als Ihtritt für is Stadion. Dä ID Abgliich am Ihgang entfallt somit. Wer sich keis Bändeli holt muss wiiterhin s Zertifikat vrowiise, sowie au dä Identitäsabglich bim beträte vom Stadion durlaufe. Drum rüefemer alli GC- Fans uf, mached vorgängig en Test, holed eu s Zertifikat, chömed an Treffpunkt in Hardturm und beziehnd det eues Bändeli.
Für GC-Fans wo nöd in Hardturm chömed gits d Möglichkeit die Bändeli im Testcenter am Mediacampus abzhole (offe abem 11:00 bis 17:00).
Wie das System mit de Bändeli für die wiitere Spiel im Letzi usgseht und wo dasmer die chan bezieh werdemer jewiils vorab informiere.
Sötts ab Oktober nüme möglich sie chostelosi Test z'becho, werde mir entsprechend über euses witere Vorgehe informiere. I Stadie wo die Möglichkeit, bezüglich vorgsondereti Kontrolle nöd bestaht werde mir die laufende Massnahme verfolge und situativ entscheide.
Treffpunkt fürs Derby für all GC-Fans Samstig 15:15 Uhr Hardturm
Chömed zahlriich, im GCZ-Trikot, Fan-Shirt, vergässed de Schal nöd und träged Blau-Wiiss ufd Strasse. Zeigemer das dä GCZ wieder zrugg isch.
Zudem gits am Treffpunkt d Möglichkeit Tickets fürs Spiel z chaufe 20.-/25.-
Vorwärts GC Züri, alles für dä Derbysieg!
12. August 2021, 10:40
Am Sunntig am 14:00 Uhr spielt dä GCZ die 1. Cup Rundi gege de FC Widnau
Fuessballfest bi dä chline Verein - das isch für dä Unterklassig mit enormen Ufwand und Chöschte verbunde. Drum rüefemer all GC Fans dezueh uf, sich es Ticket für das Cupspiel z'chaufe - unabhängig devo, obd dihei bliebsch oder d'Mannschaft vo usserhalb vom Stadion unterstützisch. Gnauso söll am Sunntig vor Ort grosszügig konsumiert werde.
Cup und dä Erhalt vo Tradition vom 18.08.2017
Es git am Sunntig kein Extrazug - organisiered eu und reised individuell ah!
Für die wo mit em Zug areised empfehlemer de Regelzug 11:09 Uhr ab Züri HB nach Heerbrugg und vo dete de Bus bis Widnau, Güetli
All uf Widnau - vorwärts GC Züri
29. Juli 2021, 18:02
Mir nämed de Regelzug uf Bern am 18.32h ab Züri HB. Es werdet aktuell kei Extrazüg zur Verfüegig gstellt und organisiert.
Hüt isch es en ID Abglich, gschlosseni Gästesektore und personalisierti Tickets. Was chunt als Nächsts? Mir gsehnd eus wiiterhin nöd als Versuchsobjekte für zuekünftigi Repressionsmassnahme. So fescht wie s'GC-Herz au blüetet, mir bliebed au in Bern vorem Stadion und unterstützed d'Mannschaft vo usserhalb. Eusi Stellignahm dezueh findsch da: Wiiterhin ohni Kurve!
Allne wiitersäge und uf Bern cho!
Vorwärts GC Züri