Konflikt mit de Polizei

Dä regelmässigi Bsuech vo Fuessballspiel chan schnell zu Konflikt mit de Polizei und em Gsetz füehre. Drum ischs wichtig, sini Rächt und Pflichte z'kenne. Die nachfolgende Abschnitt diened lediglich zur Information und ersetzed kei juristischi Beratig. Falls du wiiteri juristischi Ahliege oder offeni Frage häsch, bitte kontaktier kurveahwalt@sektoriv.ch.

Allgemeini Tipps im Umgang mit de Polizei

Ruhe bewahre
Kenn dini Rächt und Pflichte
Gschehniss dokumentiere: Nutz Foti, Video oder dis Gedächtnisprotokoll zum kritischi Situatione festzhalte.

Polizeikontrolle

I de Schwiiz gits kei generelli Uswispflicht für Schwizer Staatsbürger. D'Polizei därf dich zur Ufklärig oder Verhinderig vonere Straftat ahhalte, zum dini Identität abkläre. Häsch kein Uswis debi, oder weigerisch du dich ide Kontrolle, därfed sie dich uf de Polizeiposte mitnäh zum dini Identität feststelle. Falls du kein Schwizer Staatsbürger bisch, bisch du verpflichtet en Uswiis uf dir zträge.

Erkennigsdienstlichi Massnahme wie d Abnahm von Fingerabdrück oder d Erstellig vo Fotis därf d Polizei im Rahme vonere allgemeine Personenkontrolle nur vornäh, wenn d Identität anderwitig nöd zwiifelsfrei feststellbar isch oder de Verdacht vonere Straftat vorliht.

Polizeilichi Durchsuechig

Bi Verdacht uf e Straftat därf d Polizei dis Gepäck und dini Täsche durchsueche. Fraue därfed nur vo Fraue und Männer nur vo Männer abtastet werde. Fräg immer, wege wellere Straftat du durchsuecht wirsch.

Zuständigkeite

Transportpolizei

D'SBB-Transportpolizei därf din Uswis kontrolliere, Gegeständ beschlagnahme, dich vorläufig festnäh und dich de Polizei übergeh. Gmäss Gsetz muss d'Transportpolizei beschlagnahmti Gegenständ und vorläufig festgnommeni Persone möglichst rasch de Polizei übergäh.

D'Transportpolizei isch für Bahnhofareal und öffentlichi Verkehrsmittel zueständig und därf die obe gnannte Befugniss nur det usüebe.

Sicherheitsdienst

Ahgestellti vo private Sicherheitsfirme händ grundsätzlich nöd meh Recht als du.

Verwütsched dich die private Sicherheitslüt binere Straftat, därfed sie dich festhalte. Sie müend dich aber sofort de Polizei übergäh.

Bim Stadionihlass setzed privati Sicherheitsdienst s'det geltende Husrächt dure und därfed dich drum oberflächlich durchsueche und abtaste.

Polizeilichi Vorladig & Ihvernahm

Anere polizeiliche Vorladig isch strikt Folge z leiste, im Notfall laht sich de Termin jedoch verschiebe. Vonere ahwaltliche Beratig bereits ih dem Ermittligsstadium isch us Chostegründ ih de meiste Fäll abzseh. Wer uf de sichere Siite wetts si, chan jedoch bereits ih dem Stadium en Anwalt bizieh.

Während de Ihvernahm gilt z'eruiere, welli Bewies gege dich vorlieged. Die ihvernehmendi Person wird dich mit de vorhandene Vorwürf konfrontiere und dezue gezielti Frage stelle. Für dich isch debi lediglich Folgendes wichtig: Gits Videoaufnahme oder Bilder vo dir bim Usüebe vonere strafbare Handlig und i wellere Qualität lieged die vor, bestönd Zügeussage etc.. Vor und während de Ihvernahm werded dir nöd alli vorhandene Bewies vorgleit und teilwies finded no Ermittlige statt. Mir empfehled drum, bi de erste Ihvernahm sämtlichi Ussage z'verweigere. Au Ussage und Informatione zu andere Persone us de Kurve und zu witere Straftate bringed dir keinerlei Vorteil. D Polizei wird versueche, dich unter Druck z'setze und e Ussag/Verstrickig z'erwürke. Lahn dich dadevo nöd beeihdrucke, es isch dis Rächt dini Ussag z verweigere und drus därf keis Gständnis abgleitet werde. Zuesätzlich stellt d'Verweigerig vode Ussag dich im Strafverfahre keinesfalls schlechter. Versuech auf kein Fall, d Polizei "z'verarsche" oder Unwahrheite z Protokoll z geh. Das chan im witere Verfahre - im Gegesatz zur Verweigerig vode Ussag - strafrechtlichi und negative Uswürkige ha.

Ahschlüssend ah die ersti Ihvernahm chasch du in Rueh ahhand vode neue Faktelag entscheide, wie s witere Vorgehe usgseh söll.

Nach de erste Ihvernahm

Nach de erste Ihvernahm sött klar sii, welli Straftat dir vorgworfe wird und welli Bewies gege dich vorlieged. Jetzt gilts abzwäge, was ih dim Fall s'Beste isch. Es git zudem au d'Möglichkeit, Akteihsicht z'verlange. Mir begleited und berated dich bi de folgende Abwägig:

D Bewies sind klar, e Verurteilig isch wahrschinlich: 
Es chan sich us finanzieller und verfahrenstechnischer Sicht lohne, es Gständnis abzlege, da mer sich somit oftmals es Gerichtsverfahre spare chan und d Straf (Strafbefehl) dur d Staatsahwaltschaft usgsproche wird (Absatz unde unter Strafbefehl). E'rechtlichi Beratig empfiehlt sich Fallwis zur Beurteilig vom Strafmass.
D Bewies sind unklar, en Freispruch isch möglich:
Da chan s sich unter Umständ lohne, en Ahwalt z'näh. S'gnauere Vorgehe muss individuell besproche werde. Grundsätzlich wird mer binere Ihstellig vom Verfahre (au Ahwaltschoste) entschädigt.

Zwangsmassnahme

Erkennungsdienstlichi Erfassig:
Im Verlauf vode polizeiliche Ihvernahm wirsch du erkenningsdienstlich erfasst. Debi werded vo dir einige Fotis gmacht, d Fingerabdrücke gno sowie en DNA-Wangeabstrich entnah. Dem häsch du grundsätzlich Folge z leiste. Binere Weigerig chan die erkennungsdienstlichi Erfassig mit Zwang duregsetzt werde.

Husdurchsuechige:
Leider chans i gwüsse Fäll zu Husdurchsuechige cho. Lahn dir uf jede Fall de Husdurchsuechigsbefehl vode Staatsahwaltschaft zeige. Det drus isch au ersichtlich, was dir vorgworfe wird. Sämtlichi ah de Husdurchsuechig gfundene Gegenständ chönd zu witere Strafverfahre füehre. Dadezue gilts klarerweise z'säge, dass mer sich gezielt dezue Gedanke mache sött, wo und wie mer gwüssi Gegenständ ufbewahrt oder ob mer die nöd bewusst us de eigene Wohnig fernhalte söll.
Handydurchsuechig:
Im Zug vonere Festnahm, Husdurchsuechig oder Ihvernahm chan d Polizei dis Telefon beschlagnahme. Du häsch unter bestimmte Bedingige s'Rächt dis Telefon versiegle z'lah. Im Ahschluss wird dur es Gricht entschiede, ob dis Telefon durchsuecht werde därf.

Strafbefehl

Strafbefehl sind "Urteilsvorschläg", wo vo de Staatsahwaltschaft erlah werde chönd. D'Vorussetzige defür sind entweder es Gständnis oder eidütigi Bewies (z. B. Videoufnahme oder Zügenussage). De Strafrahme für en Strafbefehl gaht bis zu 180 Tagessätz (Geldstraf) bzw. 180 Tag Freiheitsstraf. Häsch du en Strafbefehl übercho und häsch Frage dezue, setz dich umgehend mit eus in Verbindig (kurveahwalt@sektoriv.ch). Das isch vo grosser Bedütig, damit möglichi Ihspruchsfriste (10 Tag ab Erhalt vom Strafbefehl) nöd verstriched und de Strafbefehl Rechtskräftig wird.