Sektor IV

Thun uswärts

20. Februar 2019, 20:30

Ufgrund vo dä Ereignis bi eusem letzte Bsuech in Thun, probiert d'Stadt Thun wiiteri Repressione in Form vo Kombitickets gäg eus durezsetze.

Eusi Kurve laht sich weder vom Verband, no vo dä Polizei vorschriibä, wie mir ahzreise händ und die Art vo Repression wird vo eus ganz klar nöd ohni Reaktion ahgno!

Zum de Mannschaft und de Klubfüehrig trotzdem z'zeige, wer i dem Klub d'Klubfarbe no repräsentiert, rüefemer all GC Fans uf, s'Spiel i de Sektore E11 und E12 z'verfolge. Tickets sind erhältlich uf fcthun.ch oder vorem Stadion ade Abigkasse.

Mir empfehled de direkti Zug ab Zürich HB am 13.02 h nach Thun.

GC Züri sind nur mir!

GCZ vs. Xamax

16. Februar 2019, 20:03

Morn gahts gäg Xamax, es isch Abstiegskampf und es brucht jede!! 

S'Sächsfoif isch abem 13.30h offe. 

Kämpfemer für die 3 Pünkt!

Vorwärts GC Züri!

Derby!

07. Februar 2019, 21:29

Es isch s'erste Derby im 2019! Trotz em letzte Spiel schreiemer am Samstig eusi Jungs zum Sieg!!

Dä Treffpunkt isch am 17:00h ufem Hardturm, mir laufed nachher zäme zum Letzi!

 

Infos wegem Spiel gäge Thun werded folge...

Wo blibt d Kritik us dä Kurve?

03. Februar 2019, 20:18

Öb Abstiegskampf, Trainerwechsel oder Chaos i de Chefetage: eusi Fankurve hät sich i de letschte Jahre bedingigslos hinder dä Verein und sini Mitarbeitende gstellt. Je härter dä Machtkampf um GC, desto ruhiger sind mir gsi. Das hät sin guete Grund. Unzähligi Personalwechsel bi GC händ dezue gfüehrt, dass mir Fans die einzigi Konstante vom Traditionsklub blibe sind. Statt no meh Öl is Füür z güsse, händ mir eus drum ufs Wesentliche konzentriert. Nachdem die überlebenswichtigi Hardturm-Abstimmig dank em überragende Engagement vo hunderte GC-Fans erfolgrich usgange isch, chunt jetzt d Ziit, wo au mir eus zu Wort mälded.

Scho sit Jahre wiised mir druff hii, dass eusem Verein e erkännbari Strategie fehlt. Ufm Platz isch d Talfahrt sicherlich au dä finanzielle Lag gschuldet. Näbed em Platz gits aber kei Usrede. Usezfinde, für was en Verein staht, wo er hii wott und mit welne Mittel isch e Ufgab, wo nüt choschtet. Die Forderig wird sit eim Jahrzehnt (!) mit früenerige und aktuelle Klub-Verantwortliche diskutiert. Immer und immer wieder heissts, dass mer sich bald um das Thema kümmeret. Passiert isch bis hüt gar nüt.

Mir mached eus ernsthafti Sorge um euse Verein. Nur drum machemer eusi Hauptforderige öffentlich und erhöched dä Druck. Uf das sich endlich öppis änderet!