Sektor IV

News

Cup und dä Erhalt vo Tradition

18. August 2017, 12:51

Cuptradition wahre

GC Züri het die erst Rundi im Cup souverän überstande und im Friiburgerland CS Romontois mit eme Stängeli besiegt. Cup ide Provinz bi de sogennante chline Verein – es wahrs Fuessballfest für alli Beteiligte. Doch aktuelli Gschehniss lönd eus ufschrecke und en kritische Blick uf die ganz Entwicklig richte. D‘Meldige us Luzern (Kriens het s’Heimrecht ah Luzern abtrette und s'Spiel Luzern vs Kriens het uf de Allmend statt gfunde) und us Bade (de FC Bade het ernsthaft über e Forfait-Niederlag nahdenkt) sind schockierend und en Stich is Herz vo jedem Fuessballfan.

Doch wie hets chöne sowit cho? D’Uflage für d’Verein, sones Cupspiel durezfüehre, sind imens. Es gaht um Ahforderige vom Verband und de Behörde wo schlicht nüme erfüllbar sind. En völlig unnötige Sicherheitsapparat wos z bewerkstille giht – denked an letschte Sunntig, mir hetet au ohni abgsperrte Gästesektor euse Platz hinderem Goal ihgnoh und dä GCZ vo det unterstützt. Au wenn mir in Romont en tolle Gastgeber gha hend und eus jederziit willkomme gfühlt hend: das sind Sicherheitsbestimmige und Massnahme wo unnötig chostet und keis Bedürfnis sind. Trotzdem gönd de Weg viel Chlini, nämed die Strapaze uf sich und sorged für es Volksfest. Eifachs Biispil – dä FC Bassersdorf seiht im TeleZüri, sie heged letschtmal en Verlust vo 10‘000 Stutz gha und trotzdem isch en Spielabtusch us wirtschaftliche Gründ au vier Jahr spöter gege de glich Gegner kei Sekunde es Thema. De eifach Weg wär – wie Kriens das leider gmacht het – uf sis Heimrecht verzichte. Mir wänd die Cuptradition erhalte – drum hemer eus au bi CS Romontois bedankt „pour cette fête“ (und sicher au für guete Umsatz ade Bier- und Wiiständ gsorgt).

Mir wend no viel Cupspiel bi unterklassige Verein erläbe – drum lihts a jedem, die Aforderige und dä Sicherheitsapparat kritisch z’betrachte und au euse Verein dörf die Massnahme hinterfröge und sich wenn nötig widersetze. Hüt isches Luzern, morn vilicht scho GC Züri…

 

Dä Cupfinal ghört uf Bern

Bereits sit mehrere Cupsaison staht „Dä Cupfinal ghört uf Bern“ uf eusne Spruchbänder und Fahne.

Ufgrund vom Plastikrase und dä Politik findet dä Cupfinal nüme in Bern statt. Mir setzed eus witerhin defür ih, dass s’Endspiel vom nationale Cupwettbewerb ide Hauptstadt ustreiht wird – ganz eifach, willer us Traditionsgründ uf Bern is Wankdorf ghört.