Beendigung Ustusch mit de GFAG
Rund um de Grasshopper Club Züri isch es im letschte Jahrzähnt wahrhaftig nöd ruhig blibe. Abstieg, Bsitzerwächsel nach China und USA, es dutzend Trainerwächsel und mehreri Neustarts sind eus wohl bekannt. Im Früehlig 2025 isch mit em Christoph Urech die neui Füehrigsperson (Chief Business Officer) zum Grasshopper Club Züri gstosse. Im Summer 2025 isch zwüsched de Grasshopper Fussball AG, namentlich Christoph Urech und dä GCZ-Kurve en institutionalisierte Ustusch is Läbe gruefe worde. Ziel vom Ustusch sind jeweils Besprächig vo vereins- bzw. fanrelevante Theme rund um de Grasshopper Club Züri.
De Ustusch isch uf e langfristigi und konstanti Etablierig usgrichtet und mit klare Regle, wo uf Vertraue, Ehrlichkeit und Offeheit beruhed, definiert worde.
Die aktuelli Situation und die jüngste Entwicklige bereitet eus zuenehmend Sorge. Sie zeiged dütlich, dass die notwendige Vorussetztige für en langfristige, konstante und ehrliche Ustusch zurzit nöd gäh sind. D GFAG schaffed trotz gmeinsam erarbeitete Plän ah de Ziel verbi, verspielt mit undurchsichtige Partnerschafte und Mandatsvergabe s erst grad ufbaute Vertraue. Die neuste troffene Personalentscheid dur dä Christoph Urech zeiged umso meh, dass Kritik ide neue Gschäftsstell im Chreis 1 nöd willkomme und d GFAG nöd anere wiitere Zämmearbet zwüsched Fans und Verein interessiert isch. Zuesätzlich verhaltet sich GFAG im für eus essentielle Stadionprojekt wiiterhin amateurhaft.
D'Grasshopper Fuessball AG verletzt klar die usgmachte Rahmebedingige vo dem Ustusch, was eus zwingt die Zämmearbeit zwüsched em Christoph Urech und dä GCZ-Kurve per sofort z'beende.
Mit neue Akteure sind mir jederzit bereit wieder in en Dialog ihzträtte. Mir bhaltet eus vor, wiiteri Schritt zur Wahrig vo eusenä Interesse rund um de Grasshopper Club Züri z'undernäh und löhnd nöd zue das Persone ihri Eigeinteresse über de Verein stelled.
