alli Infos zu dä Extrazüg

Chöschte und Gültigkeit
Es Ticket für dä Extrazug chostet einheitlich 58.- bzw. 29.- mit Halbtax / Chind bis 16i.

GA und normali Streckebillet sind im Extrazug gültig.

Uf dä Rückfahrt ebefalls gültig ischs seven25-Abo, au dänn, wänns bi Abfahrt nonig Sibni isch. Je nach Matchort chunts drum günstiger, für d Hiifahrt es normals Streckebillet z chaufe und für d Rückfahrt dänn s seven25-Abo z verwände.

Billetverchauf
Ah allne Billetautomate vo dä SBB und ah dä normale Schalter.

Zum es Billet am SBB-Automat z chaufe, gahsch wie folgt vor:

1. Weitere Angebote
2. Regionale Spezialangebote
3. Football-Ticket Fan-Extrazug
4. Bestätige oder Datum ändere und Ahzahl Billet, Halbtax etc. ihgäh
5. Zahle

Abfall
In Zämmearbet mitm Fanprojekt wird dä Abfall während dä Fahrt ihgsammlet. Benütz drum die vorgsehene Abfallbehälter und schmeiss kei Dose oder Fläsche usm Zug.
Am Ahkunftsort wird dä Zug dur d SBB putzt. Wänn du Getränk oder anderi Gegeständ für d Rückfahrt wotsch ufbewahre, muesch es uf dä Gepäckablag lagere.

Sachbeschädigunge, Chläber und Tags
Sachbeschädigunge, Chläber und Tags händ im Extrazug nüt verlore! Spared eui Chläber und Tags zum d'Stadt verschönere!