Vorwärts GC Züri

STADION JA

S Resultat vom 27. September 2020 hätt eimal meh zeigt, Züri will das Stadion. Es grosses Danke a Jedi und Jede wo sich ide letzte Täg, Woche und Mönet engagiert und alles für das Ja geh hät. Sones klars Ja het sich lang nöd abzeichned und isch nur dank de Mobilisierig durch eus möglich gsi.

D'Bevölkerig hätt damit zum letzte Mal demokratisch, klar und düütlich entschiede. Es wird kei wiiteri Abstimmig meh geh. Jetzt liehts ade Verlürer au endlich i zgseh, dass ufem Hardturm wieder tschutted wird. Somit erwartet mir vo allne Gägner, de Wille vode Stadtzürcherinne und Stadtzürcher z'akzeptiere und am Projekt kei wiiteri Stei in Weg zlegge, damit so schnell wie möglich mit de Bauarbeite gstartet wird.

Miteme grosse Füürwärch händ mir eus bi Allne bedankt und setzed au wiiterhin alles drah, damit euse GCZ so schnell wie möglich wieder im Hardturm spielt.

MIT PUBLIKUM, ABER OHNI KURVE

Abem 1. Oktober sind unter verschiedene Uflage Zueschauer im Stadion wieder erlaubt. Mir händ eus bereits dezueh güsseret (Mit Publikum, aber ohni Kurve), wieso mir als Fanszene unter dene Vorussetzige bis uf Wiiters nöd in Erschinig trättet. Es isch schlussendli allne GCZ Fans selber überlah, ob sie unter dene Umständ Lust uf en Stadionbsuech hend und als Einzelperson an Match gönd. D'Kurve wird aber bis uf Wiiteres nöd als söttigi ufträtte.

SAISONCHARTE CHAUFE

Au wänn mir als Kurve erst zrugg chered, wenn wieder de Fuessball statt s'Virus de Takt vorgiht, isches enorm wichtig, de GCZ trotzdem z'unterstütze. Drum rüefemer alli zum Chauf vode Saisoncharte 2020/2021 uf. Bstelle chasch sie direkt unter folgendem Link. Bekenn Dich au i dene Ziite zum GCZ und unterstütz d'Mannschaft im Kampf um de Ufstieg!