Fanturnier 2017

Dä Samstig gaht s'Fanturnier i die nächsti Rundi! Zum eu en Überblick geh, da die wichtigste Infos rund um dä Tag!

Fanturnier
Stelled dä Wecker - das Jahr gaht's früeh los! Pünktlich am 7.30h startemer mit de erste Spiel - dassmer mitem Turnier rechtziitig bis zum Testspiel fertig sind.

Wiiteri Infos und Spielziite findeter wie folgt:
Spielplan Fanturnier 2017
Spielplan Fanturnier 2017 nach Gruppe
Reglement fürs Fanturnier 2017

Denked drah eue Biiträg vo 120.- möglichst passend am Turniertisch z zahle. Chömed mit dä öV in Campus - nöd nur wege de günstige Bierpriise!

Tombala
Es giht e GCZ Tombala mit schöne Priise z günne. Löösli bechunsch abem 9.00h für 1 Stutz pro Los bide flüügende Verchäufer und ab 15.00h chasch din Priis am Gabetisch abhole. Die drüü Hauptpriise wemer eu natürli nöd vorenthalte:
- Probetraining mit de 1. Mannschaft
- Kabinebsuech vorem Spiel im Letzi (leeri Kabine) und s'Ufwärme vo de Siitelinie verfolge
- bimene Teamesse debi z'sii

Rampeverchauf
Dä allsiits beliebti Rampeverchauf, wos Juwele und Fundstück z'erwerbe giht, findet au das Jahr statt. Dä Verkauf gaht vom 13.00h bis 16.00h.

Sächs Foif
Lös dini Mitgliedschaft fürs Sächs Foif am Samstig ufem Campus. Für 19 Stutz bisch au du Mitglied für d'Saison 2017/2018!

Spänd dini nüme benötigte Fuessballutensilien
Mitem Fanturnier endet für vieli Fuessballutensilie die üblichi Lebensdur, au wänn sie no z'bruche wäred. Drum bringed eui nüme benötigte Artikel (Fussballschueh, Schiebeischoner, Trikots, etc) mit as Turnier und gänd sie bim Turniertisch ab. Sie werdet im chürzlich eröffnete Bundesasylzentrum in Embrach gern gnutzt. D'Bewohner vom Bundesasylzentrum Juch in Altstetten spieled au hüt no mit eue zahlriiche Spende vom 2014!

Testspiel
Am 16.00h spielt die 1. Mannschaft gege Austria Lustenau. Hopp GCZ!

Usverchauft!

I de letschte elf Täg sind so viel Saisoncharte für dä Sektor B abgesetzt worde, dass mir gnueg Lüüt sind, zum d Kurve bis uf dä letschti Platz z fülle. Jetzt machemer au no die restliche Sektore volle!

Nur no 900 wiiteri Saisonabonnente bruchts und s Ziel vo 2'500 Saisoncharte im gsamte Sektor B sind erreicht. Gib drum nomal alles und bring dis ganze GC-Umfeld zrugg is Stadion.

Los jetzt!

Fanturnier 2017

Denk drah: no dä Mittwuch zwüsched 12.00h und 18.00h nimmt s'Fanprojekt Ahmeldige im GC Fanshop entgege!

Druck s'Ahmäldeformular us und meld dini Mannschaft für s'Turnier am 8. Juli ah!

Für de Grill und Getränkestand suechemer no wenigi Helferinne und Helfer! Meldet eu doch direkt bim Fanprojekt unter mattias.cadonau@fanprojekt-gcz.ch.

Infos zude Uslosig, Spielplan und em restliche Tagesprogramm folged!

Wiiter so!

Nöd mal 48h sind ume und scho über 600 Saisonabos für dä Sektor B sind weg. Bi wiitere 1000 Saisonchartene isch d Fankurve volle. Das schaffemer!
D Ahzahl ah verchaufte Saisonchartene im Fansektor wird im obige Kurvebild automatisch aktualisiert und mit dä verchaufte Saisonchartene vo dä U-16-jährige laufend ergänzt (U-16-jährigi chaufed ihres Saisonabo für 99.- über die übliche Kanäl).

Es liit ganz elei ah dir, öb mir eusi Fankurve und drüberhinus au die restliche Sektore im B fülled (insg. 2500 Saisonabos). Schrib also allne GC-Kollege und motivier sie, no hüt e Saisoncharte z chaufe.