Gäge Multi-Club-Ownership und usländischi Investore
Während mir sportlich uf es wiiters sehr schwierigs Jahr zrugg lueged, verdichtet sich im Hintergrund de Hiwiis uf en mögliche Bsitzerwächsel. Nach turbulente Jahr und wächselnde Eigetümerstrukture unter chinesische Investore und amerikanische Bsitzer rund um LAFC staht d’Zuekunft vom Club erneut amene entscheidende Punkt.
D’Mediebricht und zahlriichi Informatione us em Umfeld vom Verein nähred d’Grücht um en mögliche Verkauf ad Bridge Football Group. Für d’Fanszene isch d’Sach klar: Mir lehned Investore ab, wo de Verein als Teil vomene internationale Mehrclub-Konstrukt missbruched und dezue biiträged, dass sich de Club Jahr für Jahr meh vo sinere Identität entfremdet und ih usländische Händ isch.
D’Fanszene hät ide letschte Mönet und Jahr immer wieder dütlich gmacht, dass sie weder d’Vergangeheit unter Fosun, no die aktuelli Situation mit de LAFC-Eigentümer akzeptiert. D’Entwicklige vo de letschte Jahr zeiged, dass wirtschaftlichi Interesse immer wieder über d’Wert und d’Identität vom Verein gstellt worde sind. Ä Übernahm dur d’Bridge Football Group wär nüt anders als d’Fortsetzig vo dere Fählentwicklig.
De GCZ Ghört i Zürcher Händ
Mir appelliered a dere Stell a alli Gönner, Legände, de Zentralvorstand, d’Grasshopper-Fuessball Stiftig, d’GC-Fuessballsektion und wiitere ihflussrichi Persone und Gruppe im Umfäld vom Verein sich gäge en Verchauf ad Bridge Football Group uszspräche. Nähmed eui Verantwortig als Teil vom GCZ wahr und verhinderet, dass de Verein wiiter als Spekulationsobjäkt, Usbildigsplattform oder Teil vomene internationale Netzwerk missbrucht wird.
En Zürcher Wäg isch nonig absehbar – und wänn doch, isch jetzt de richtig Momänt sich z’erkenne zgeh und id Öffentlichkeit z’trete. Mir glaubed a die Lösig und lönd nüt unversuecht. Jedi Form vonere erneute Multi-Club-Ownership und usländische Investore wärdet mir konsequent nöd akzeptiere und eus vo Ahfang ah mit allne verfüegbare Mittel gäge es wiiters sötigs Modäll stelle.
Für eus isch klar: GC brucht ä langfristigi Perspektive mit Verantwortliche, wo de Verein, sini Identität und Tradition känned, ihn transparent füehred, stabilisieret und die Wärt glaubwürdig nach usse verträtted.
Es isch a dä Zit, dass de Grasshopper Club Züri i aller Konsequenz än neue Wäg iischlaht – wäg vo usländische Investore und Konstrukt. Zrugg zu sine Wurzle und lokaler Verankerig in Züri.