Uf eusi Chappe

Die bevorstehendi WM in Katar erzwingt e früehzitigi Winterpause. Das büütet eus d'Chance, über eusi Rolle im usufernde Fuessball-Business nahzdänke.

Als Fankurve setzed mir eus für en Fuessball ih, wo jede und jedi willkomme isch. Diskriminierige nach Gschlächt, sexueller Orientierig oder Herkunft händ bi eus nüt verlore. Vo so Ideal isch s WM-Gastgeberland Katar wiit entfernt. Imene Land, wo Homosexualität verbote isch und Fraue under dä Obhuet vo Männer stönd, chan vo Fuessball für alli kei Red sii.

D'FIFA bhauptet, dass d'WM d'Mänscherechtslag in Katar verbesseret. Fakt isch, dass mehreri tuusig Gastarbeiter bim Bau vo dä WM-Stadie gstorbe sind und ihri Familie bis hüt weder vo Katar no vo de FIFA entschädigt worde sind.

Doch nöd nur d'FIFA staht i de Verantwortig sondern au mir Fans. Mir wo d'WM-Mätch lueged, Panini-Bilder sammled und FIFA gamed, sind Teil vom Problem und müend au en Teil vo dä Schuld uf eusi Chappe näh.

Mit dä glichnamige Aktion verchaufed mir am Samstig GC-Winter-Chappene. Dä gsamti Erlös gaht ah Amnesty International, wo Familie vo verstorbene Gastarbeiter unterstützt.

Und für die wo nöd an Match chönd cho, aber trotzdem öpis wänd gäh, chönd ihr unter dem Link direkt spende.

Lönd eus während dä WM nöd vergesse, wer für 90 Minute Fuessball sis Läbe verlore hät und fangemer ah, euse Fuessballkonsum selbstkritisch z hinterfräge.

Fuessball isch für alli!