Wert vode Kurve

Ide letzte Saison isch eusi Kurve medial immer wieder mit Unterwanderige und politische Strömige in Verbindig bracht worde. Du als Kurvegänger weisch, dass das absolute Chabis isch. Eusi Kurve isch es Ebebild vo dä Gsellschaft, wo sich dur Vielfalt uszeichnet. Als Bewiis langet am Match en Blick um dich ume: näbed dir stönd Manne und Fraue, jung und alt, chli und gross, schwarz und wiis, arm und rich, wo all fürs gliche kämpfed. Im Gegeteil zur boulvardeske Darstellig werded Rassismus und faschistisches Verhalte i de Kurve nöd toleriert. D’GC Kurve isch en Ort, wo Freirüüm no möglich sind und en Ort, wo jede und jedi GC Fan willkomme isch. Diskriminierige nach Gschlächt, sexueller Orientierig oder Herkunft hend ide Kurve sit jeher nüüt verlore.

Au de Verein sälber hät i sine Statute klari Wert festgleit. So staht u.a.: «.... wir bieten so der nächsten Generation eine sinnvolle Alternative für ihre Freizeit – ungeachtet ihrer Herkunft». Und: «bei GC herrscht ein offener Geist: Gegenüber anderen Sportarten, aber auch gegenüber anderen Kulturen und Mentalitäten.»

Mier all sind GC Züri. Und mier all stönd für d’Wert vode Kurve und vom Verein ih - und wend die positiv nach usse träge.