Endlich wieder es Dihei

Nach langem Warte, viel Geduld und viel investierter Chraft und Ziit händ mir mit 53,8 % es Ja zum Hardturm erreicht! Dä historischi Sieg isch nur dank eus GC-Fans möglich gsi. Egal öb flyere, spende, plakatiere, schriibe oder diskutiere: mir händ eus d Heimat us eigener Chraft zrugggholt. En riese Dank ah all, wo sich im Abstimmigskampf engagiert händ. Gmeinsam händ mirs gschafft!

Dä Abstimmigssieg isch nöd nur für GC als Verein, sondern au für eus als Kurve wägwiesend. Eusi Freud hät scho gäg St. Galle und im Derby mit Fahne und Füürwerk Usdruck gfunde. Jetzt neigt sich d Ziit im Exil am Endi zue. Dank em neue Hardturmprojekt isch eusi alt Heimat endlich in Planig - und dä Rosthuufe offiziell zumene Uswärtsstadion vercho.

Was bedütet das für d Kurve?

Lömmer eus vo dä Euphorie vom Abstimmigssieg mitrisse! Bringed eui Fahne wieder is Stadion, schwenked sie 90 Minute lang und singed und schreied all die uufgstaute Emotione vo elf verdammt härte Jahre im Exil use!

Wie a allne Usswärtsmätch wirds ab sofort au in Züri Glägeheite für Füürwerk und Choreos gäh. Für das bruchemer jedi und jede. Schlüss dich mit anderne zämme, organisiered eu und bringed eu is Kurvegschehe ih.

Mit Fahne, Farbe und Füür

Gnueg lang händ mir uf jegliche visuelle Support für eusi Jungs verzichtet. Jetzt isch Ziit für e Veränderig! Triibemer euse Verein mit Fahne, Farbe und Füür vorwärts und holemer eus nachem politische Abstimmigssieg au dä sportlichi Erfolg.

Gmeinsam händ mir die Abstimmig gunne. Gmeinsam lömmer eusi Kurve wieder ufläbe!

Los jetzt!