Es Ja zum GCZ
27. November 2018, 10:16
Es stimmt halt ebe doch: wer alles git, chan au alles erreiche.
Für es Ja zum Hardturm hämmer i de ganze Stadt 86'250 Flyer und 10'500 Brief verteilt, 56 Spruchbänder gmalt, 800 Plakat ufghänkt, hunderti Postkarte verschickt, unzähligi Lesebrief gschriebe und online für Furore gsorgt. S Ja zum neue Stadion isch drum nöd nur es Ja zum Fuessball, sondern au es Ja zum GCZ.
Und jetzt, ja jetzt neigt sich d Ziit vom Exil am Endi zue. Trägemer d Euphorie wiiter und vollended, was mir ahgfange händ: zrugg i eusi Heimat, euse Hardturm!