Mir chömed zrugg

Es sind erscht es paar Wuche vergange, sit mir d Saison 2016/17 abgschlosse händ. Einersiits froh drüber, dass mir nöd abgstiege sind. Anderersits fragend, wies zuekünftig söll besser wärde - sowohl uf als au näbed em Platz.
Au d GC-Füehrig hät sich Gedanke gmacht, wie euse Verein wieder zu neuem Läbe erweckt wärde chan. Und: mir chönd eus freue! Als Dank für eusi Treui verchauft dä Grasshopper Club Züri alli Saisonchartene 40 % günstiger. Es Kurveabo choschtet demit nur no 195 Franke. Bedingig isch, dass 4'000 GC-Fans mitmached. Das crowdfunding startet i däne Minute und duuret bis zum 10. Juli.

Das isch aber nonig alles. No während dä kommende Saison wird im Zürcher Gmeindrat über dä neu Hardturm diskutiert, d Volksabstimmig folgt scho im nächste Jahr. Mir müend eus zwar no chli gedulde, bis mir wieder zrugg in Chreis 5 ziehnd. Scho ab dä nächste Saison zeigemer aber ah jedem Spiel, wie wichtig eus dä Hardturm isch. Elei das isch Grund gnueg, ah jede Match z cho!

Chauf dir jetzt e Saisoncharte und teil dä Bitrag mit all dine GC-Kollege. Mit dim Ihsatz füllemer die Kurve!