Wo blibt d Kritik us dä Kurve?
Öb Abstiegskampf, Trainerwechsel oder Chaos i de Chefetage: eusi Fankurve hät sich i de letschte Jahre bedingigslos hinder dä Verein und sini Mitarbeitende gstellt. Je härter dä Machtkampf um GC, desto ruhiger sind mir gsi. Das hät sin guete Grund. Unzähligi Personalwechsel bi GC händ dezue gfüehrt, dass mir Fans die einzigi Konstante vom Traditionsklub blibe sind. Statt no meh Öl is Füür z güsse, händ mir eus drum ufs Wesentliche konzentriert. Nachdem die überlebenswichtigi Hardturm-Abstimmig dank em überragende Engagement vo hunderte GC-Fans erfolgrich usgange isch, chunt jetzt d Ziit, wo au mir eus zu Wort mälded.
Scho sit Jahre wiised mir druff hii, dass eusem Verein e erkännbari Strategie fehlt. Ufm Platz isch d Talfahrt sicherlich au dä finanzielle Lag gschuldet. Näbed em Platz gits aber kei Usrede. Usezfinde, für was en Verein staht, wo er hii wott und mit welne Mittel isch e Ufgab, wo nüt choschtet. Die Forderig wird sit eim Jahrzehnt (!) mit früenerige und aktuelle Klub-Verantwortliche diskutiert. Immer und immer wieder heissts, dass mer sich bald um das Thema kümmeret. Passiert isch bis hüt gar nüt.
Mir mached eus ernsthafti Sorge um euse Verein. Nur drum machemer eusi Hauptforderige öffentlich und erhöched dä Druck. Uf das sich endlich öppis änderet!