S traditionelle GCZ-Libli erhalte!

Än Blick id Gschichtsbücher zeigt, dass euse GCZ scho ide 1890er Jahr mitem ganz klassische Blau-Wiis teilte Libli ufgspielt hät. Au dä Ruggebereich isch immer teilt gsi. D Farb vode Ärmel hät mer jewils farblich entgegesetzt zur jewilige Brust bzw. Ruggehälfti ghalte. Andersch wie anderi Klüb, wo au scho i früehnere Jahr regelmässig d Ufmachig vo ihrer Spielchleidig - einigi bekanntlich gar d Klubfarbe - gwächslet händ, hät die Tradition bim GCZ ohni Unterbruch sit bald 130 Jahr bestand.

Leider isch die Tradition ide letschte Jahr meh und meh nümm gläbt worde. Mal hät me uf di traditionelle Ärmelfarbe, mal uf di teilti Ruggeflächi verzichted. E Enttüschig i dere Hisicht isch s aktuelle Trikot, wo einzig no e teilti Brust hät.

Als Fans vom Grasshopper-Club Züri setzemer eus für dä Erhalt vo eusne Klubtraditione ih. Dadezue ghört au, sich selber z reflektiere und Fehler z erkenne. Mir händ eus ide letschte Jahr nie für die i eusne Auge so wichtig Tradition vo eusem Trikot ihgsetzt. Das wämmer jetzt aber ändere und eus bim Klub für di traditionell Spielchleidig starch mache. Reglementarie wo de traditionelle Trikotgstaltig entgegestönd, gits übrigens kei. Verlangt wird einzig, dass d Ruggenummere guet sichtbar sind, was beispielswiis mit blau-wiisem Rugge und de bekannte Orange Nummere zwiefelsohni gäh isch.  D Vorzeiche stönd also guet, dass d GCZ Fuessballer scho bald wieder im unverkännbare Gwand uflaufe werded.

Sektor IV