Mir sind GC

Dä Verein und eusi Kurve händ e schwierigi Hirundi hinter sich. Leider gseht d Perspektive für die kommendi Rückrundi momentan nöd grad viel besser us. No immer spielemer im Letzi und de neui Hardturm schiint no in wiiter Ferni z sih. Dä Käpten hät zu allem ane no de Klub verlah und d GC-Füehrig laht d Stadt wiiterhin links ligge.

Jede vo eus merkt, dass sich das negative Klima rund um de Verein au langsam uf eus Fans übertreit hät. So därfs nöd wiitergah! Mir händ scho vieli schwierigi Situatione miterlebt. Während sich anderi Fankurvene händ chöne ufs Wesentliche konzentriere, ischs bi eus immer wieder um die nackti Existenz gange. Dä Uszug us em Hardturm, dä Fascht-Bankrott, dä drohendi Wegzug us Züri, dä sportlichi Abstieg, s Stadiondebakel und die unzählige Füehrigswechsel bi GC – sie alli händ eus viel Chraft koschtet. Doch i all däne Situatione sind mir eus und eusem Verein treu blibe. Mir händ dä Verein gstärcht, zelebriert und gar grettet. All die Spiel, wo mir d Mannschaft füre gschroue händ, wo mir zämmegstande und für euse GCZ ihgstande sind. All die Uswärtsreise, wo mir uf eus gno händ. All die Drecksspiel im Letzi, wo mir über eus ergah lah händ. All das zeigt, dass mir eus au jetzt nöd unterkriege lönd. Mir sind d Stütze vo däm Verein, die einzigi Konstante, sin grösschte Ahhänger, dä 12. Maa. Mir sind GC!

Am Samschtig geg Thun gits die erscht Glägeheit, eusi Entschlosseheit under Bewiis z stelle. Egal öb Mitglied vonere Fangruppe oder nöd: jetzt isch Ziit cho, zämme z stah und wie e Wand hinder eusere Mannschaft z stah. Mobilisier all dini GC-Kollege, zieh dini Kurveschueh ah und chum uf die 13.30h is Sächsfoif.

Los jetzt!