alli Infos zu dä Extrazüg

Chöschte und Gültigkeit
Es Ticket für dä Extrazug chostet einheitlich 58.- bzw. 29.- mit Halbtax / Chind bis 16i.

GA und normali Streckebillett sind im Extrazug gültig. EasyRide und via Fairtiq kaufti Billett sind nöd gültig.

Billettverchauf
Ah allne Billettautomate vo dä SBB, ah dä normale Schalter und online.

Zum es Billett am SBB-Automat z chaufe, gahsch wie folgt vor:
1. Weitere Billette und Angebote
2. Regionale Spezialangebote / Freizeit
3. Football-Ticket Fan-Extrazug
4. Bestätige oder Datum ändere und Ahzahl Billett, Halbtax etc. ihgäh
5. Zahle

Abfall
In Zämmearbet mitm Fanprojekt wird dä Abfall während dä Fahrt ihgsammlet. Benütz drum die vorgsehene Abfallbehälter und schmeiss kei Dose oder Fläsche usm Zug.
Am Ahkunftsort wird dä Zug dur d SBB putzt. Wänn du Getränk oder anderi Gegeständ für d Rückfahrt wotsch ufbewahre, muesch es uf dä Gepäckablag lagere.

Sachbeschädigunge, Chläber und Tags
Sachbeschädigunge, Chläber und Tags händ im Extrazug nüt verlore! Spared eui Chläber und Tags zum d'Stadt verschönere!